Imran Aami
main sach kahun pas-e-divar jhuuT bolte hain
mire ḳhilaf mire yaar jhuuT bolte hain
mili hai jab se unhen bolne ki azadi
tamam shahr ke aḳhbar jhuuT bolte hain
main mar chuka huun mujhe kyuun yaqin nahin aata
to kya ye mere aza-dar jhuuT bolte hain
ye shahr-e-ishq bahut jald ujaḌne vaala hai
dukan-dar o ḳharidar jhuuT bolte hain
bata rahi hai ye taqrib-e-mimbar-o-mehrab
ki muttaqi o riya-kar jhuuT bolte hain
qadam qadam pe na.i dastan sunate log
qadam qadam pe ka.i baar jhuuT bolte hain
main sochta huun ki dam len to main unhen Tokun
magar ye log lagatar jhuuT bolte hain
hamare shahr men ‘ami’ munafiqat hai bahut
makin kya dar-o-divar jhuuT bolte hain
Leave a Reply