afroz-alam

Aks-Bar-Aks

yuun to diye namnak men

aks-e-kashida hadsat-o-vaqiat ki

apni koi ahmiyat nahin hoti

lekin

munakis zehn ghaur zarur karta hai

khud se saval karta hai

khud ko javab deta hai

aur

apne javab ko sach sabit karne ke liye

dalilen pesh karta hai

lekin

main ek shair huun ek aina huun

samaj ka aina

mire daere men aane vaale

vajud ko mahfuz karna

miri fitrat hai

ye vajud

meri ankhon men nami jaisi

mere honton pe hansi jaisi

koi chiiz rakh deta hai

phir bhi mere liye ye zaruri nahin

ki main

apne batin men kashida

vajud ke difaa men dalil duun

mujhe chhupane ka ikhtiyar hai

aap samajhne ke liye azad hain

More Poems

Leave a Comment