duur hua ibham kahani khatm hui
aa pahuncha anjam kahani khatm hui
shahzada shahzadi rasta bhuul gae
raah men ho gai shaam kahani khatm hui
mat chhedo vo saz-e-taalluq khatm hua
mat lo us ka naam kahani khatm hui
kis ki khatir ab tu dhadakta rahta hai
ai dil kar aram kahani khatm hui
sunne vaale bas thoda sa sabr karen
qissa hua tamam kahani khatm hui
guzri umr ki baton ko dohrana kya
ab khvahish hai khaam kahani khatm hui
yaad nahin hai bichhde vo kirdar kahan
yaad nahin kis gaam kahani khatm hui
‘shabnam’ aao naya safar aghaz karen
yaan apna kya kaam kahani khatm hui
Leave a Reply