Anwar Minai
aaj mujhe kuchh log mile hain pagal se
shahr men vahshi dar aa.e kya jangal se
saare masa.il la-yanhal se lagte hain
niklun kaise soch ki gahri daldal se
barf-numa si taron ki chanchal kirnen
chhan kar niklen raat ke kaale anchal se
zehn se yuun hai fikr-o-nazar ka ab rishta
panghaT ko ik rabt ho jaise chhagal se
yaad ki ḳhushbu dil ke nagar men phailegi
gham ke saa.e lagte hain ab shital se
jism-o-jan par sannaTon ka pahra ho
baaz aaya main ab duniya ki halchal se
tanha.i ka zahr bhala kya phailega
chha.e ho tum ehsas pe mere badal se
Leave a Reply