jalva-e-arbab-e-duniya dekhiye
svang hai ye bhi tamasha dekhiye
sair ko utthe to hain vahshi mizaj
baagh jaate hain ki sahra dekhiye
gar-che til hai us ke munh par khushnuma
nahs hai kya ek taara dekhiye
roiye jitna rulae hijr-e-yar
ghar men baithe sair-e-dariya dekhiye
charkh-e-minai muafiq ho agar
dur-daur-e-jam-e-sahba dekhiye
ya-ilahi khair phir aae bahar
kya harara laae sauda dekhiye
kal jo kuchh surat hui thi mit gai
aur hi hai aaj naqsha dekhiye
abruon men phir girah padne lagi
bal tabiat men phir aaya dekhiye
dardmand-e-chashm hain darman-talab
dekhte bhi hain masiha dekhiye
intizar-e-yar kahta hai yahi
zindagi jab tak hai rasta dekhiye
vasl sabit hai tafadil se magar
kab vo aata hai zamana dekhiye
kya bala-e-bad hai ye bad-e-khizan
ho gai sab phuul patta dekhiye
bazm-e-na0-pursan men qismat laai hai
baithiye apni agar ja dekhiye
‘bahr’ agar chamka sitara aish ka
laili-e-gardun ka mujra dekhiye
Leave a Reply