Nida Fazli
chahaten mausami parinde hain rut badalte hi laut jaate hain
ghonsle ban ke tuut jaate hain daagh shakhon pe chahchahate hain
aane vaale bayaz men apni jaane valon ke naam likhte hain
sab hi auron ke khali kamron ko apni apni tarah sajate hain
maut ik vahima hai nazron ka saath chhutta kahan hai apnon ka
jo zamin par nazar nahin aate chand taron men jagmagate hain
ye musavvir ajiib hote hain aap apne habib hote hain
dusron ki shabahaten le kar apni tasvir hi banate hain
yuun hi chalta hai karobar-e-jahan hai zaruri har ek chiiz yahan
jin darakhton men phal nahin aate vo jalane ke kaam aate hain
Leave a Reply