mire hathon men ubhra hai ye naqsha kis tarah ka hai
miri ankhon men Thahra hai ye dariya kis tarah ka hai
ye mera jism hai azad lekin ruuh qaidi hai
ḳhudaya koi batlae ye pinjra kis tarah ka hai
miri aahon ko mere qahqahon ne dhank rakkha hai
miri is laash ke uupar ye malba kis tarah ka hai
hai jin men bojh duniya bhar ka maz.hab ke havalon se
mire bachchon ke kandhe par ye basta kis tarah ka hai
tumhen malum bhi hai ki vo niyyat ko parakhta hai
ye kis lalach men karte ho ye sajda kis tarah ka hai
main ḳhud ko dhundne nikli thi kuchh bikhre varaq le kar
tire andar huun ja pahunchi ye naqsha kis tarah ka hai
hamen avaz dena hai nabi ko janib-e-mahshar
ḳhuda avaz de jis ko vo banda kis tarah ka hai