Athar Nafees
saaya mera saaya vo
mujh men aan samaya vo
din nikal aaya angan men
raat ga.e jab aaya vo
mere lahu ki gardish men
chupke se dar aaya vo
meri gali men raat ga.e
lahrata ik saaya vo
ghuncha sa mire saath gaya
sub.h talak khil aaya vo
meri zinda sanson men
kaisa aan samaya vo
qurb ki halki barish men
qaus-e-quzah ban aaya vo
mujh se hua bebak magar
phulon se sharmaya vo
hijr ke tapte sahra men
meri tarah kumhlaya vo
ji na sakun main jis ke baghair
akasr yaad na aaya vo
‘nasir’ sachcha sha.er tha
aaj bahut yaad aaya vo
kaise kaise ruup liye
shahr-e-ghazal men aaya vo
Leave a Reply