Abdul Hamid Adam
khali hai abhi jaam main kuchh soch raha huun
ai gardish-e-ayyam main kuchh soch raha huun
saaqi tujhe ik thodi si taklif to hogi
saghar ko zara thaam main kuchh soch raha huun
pahle badi raghbat thi tire naam se mujh ko
ab sun ke tira naam main kuchh soch raha huun
idrak abhi puura taavun nahin karta
dai bada-e-gulfam main kuchh soch raha huun
hal kuchh to nikal aaega halat ki zid ka
ai kasrat-e-alam main kuchh soch raha huun
phir aaj ‘adam’ shaam se ghamgin hai tabiat
phir aaj sar-e-sham main kuchh soch raha huun
Leave a Reply