ik din
tum ne mujh se kaha tha
dhuup kadi hai
apna saaya saath hi rakhna
vaqt ke tarkash men jo tiir the khul kar barse hain
zard hava ke pathrile jhonkon se
jism ka panchhi ghayal hai
dhuup ka jangal pyaas ka dariya
aise men aansu ki ik ik buund ko
insan tarse hain
tum ne mujh se kaha tha
samay ki bahti naddi men
lamhe ki pahchan bhi rakhna
mere dil men jhank ke dekho
dekho saton rang ka phuul khila hai
vo lamha jo mera tha vo mera hai
vaqt ke paikan be-shak tan par aan lage
dekho us lamhe se kitna gahra rishta hai
Leave a Reply