kisi ka dard ho dil be-qarar apna hai
hava kahin ki ho siina figar apna hai
ho koi fasl magar zakhm khul hi jaate hain
sada-bahar dil-e-dagh-dar apna hai
bala se ham na piyen mai-kada to garm hua
ba-qadr-e-tishnagi ranj-e-khumar apna hai
jo shaad phirte the kal aaj chhup ke rote hain
hazar shukr gham-e-paedar apna hai
isi liye yahan kuchh log ham se jalte hain
ki ji jalane men kyuun ikhtiyar apna hai
na tang kar dil-e-mahzun ko ai gham-e-duniya
khudai-bhar men yahi gham-gusar apna hai
kahin mila to kisi din mana hi lenge use
vo zud-ranj sahi phir bhi yaar apna hai
vo koi apne siva ho to us ka shikva karun
judai apni hai aur intizar apna hai
na DhunDh ‘nasir’-e-ashufta-hal ko ghar men
vo bu-e-gul ki tarah be-qarar apna hai