Khayal-O-Khwab Hua Barg-O-Bar Ka Mausam

khayal-o-khvab hua barg-o-bar ka mausam

bichhad gaya tiri surat bahar ka mausam

kai ruton se mire nim-va darichon men

thahar gaya hai tire intizar ka mausam

vo narm lahje men kuchh to kahe ki laut aae

samaaton ki zamin par phuvar ka mausam

payam aaya hai phir ek sarv-qamat ka

mire vajud ko khinche hai daar ka mausam

vo aag hai ki miri por por jalti hai

mire badan ko mila hai chinar ka mausam

rafaqaton ke nae khvab khushnuma hain magar

guzar chuka hai tire eatibar ka mausam

hava chali to nai barishen bhi saath aaiin

zamin ke chehre pe aaya nikhar ka mausam

vo mera naam liye jaae aur main us ka naam

lahu men guunj raha hai pukar ka mausam

qadam rakhe miri khushbu ki ghar ko laut aae

koi batae mujhe ku-e-yar ka mausam

vo rose aa ke mujhe apna pyaar pahnae

mira ghurur hai bele ke haar ka mausam

tire tariq-e-mohabbat pe barha socha

ye jabr tha ki tire ikhtiyar ka mausam

Leave a Comment