use paanv jamane ko kinara mil gaya hai
banega dost ab dushman ishara mil gaya hai
bahut ro.e hain maan beTe kisi ko yaad kar ke
bahal ja.ega beTe ko ghubara mil gaya hai
saheli saath chalte hain chal us ki chhanv men ham
ghazab ki dhuup men ik abr-para mil gaya hai
vo mera ḳhud-nigar naraz ho kar jaane vaala
palaT aaya to main samjhi dobara mil gaya hai
safar ki samt ka main ḳhud ta.ayyun kar chuki thi
na jaane tum ye kyuun samjhe sitara mil gaya hai
hui pal bhar men ḳhakistar ta.alluq ki imarat
bhare barud ko jaise sharara mil gaya hai
hain us ke sar-varaq pur-ḳhar phulon se ziyada
hamen agli mohabbat ka shumara mil gaya hai
chhupa kar zikr karna tha mira sheron men us ne
so us ko jal-pari ka isti.ara mil gaya hai
Leave a Reply