Poet
nikal laaya hai ghar se ḳhayal ka kya ho
laga hai zaḳhm to ab indimal ka kya ho
le aa.e kucha-e-dilbar se dil ko samjha kar
hai be-qarar bahut dekh-bhal ka kya ho
luTa ke maazi nazar is sadi pe rakkhi hai
pe naqsha dekhiye tahsil haal ka kya ho
abhi zamana-e-maujud ki giraft men huun
main sochta huun ki fikr-e-ma.al ka kya ho
tha bab-e-shauq ki auraq-e-shab pe likhte rahe
uḌa ke le ga.i shab to malal ka kya ho
ḳhayal-e-ḳham ko duniya apaj samajhti hai
hamari dida-vari ke kamal ka kya ho
nigar-e-zist ko avval bahut hasin paaya
ulajh gaya huun to ab is vabal ka kya ho
jo asl majra tha barmala kaha main ne
phir us ke ba.ad tire ehtimal ka kya ho
ḳhayal rahta hai ‘shahid’ vo tursh-ru hai bahut
vahan jo ja.un to vaz-e-saval ka kya ho
Leave a Reply