Faiz Ahmad Faiz

Kai Bar Is Ka Daman Bhar Diya Husn-E-Do-Alam Se

kai baar is ka daman bhar diya husn-e-do-alam se

magar dil hai ki is ki khana-virani nahin jaati

kai baar is ki khatir zarre zarre ka jigar chera

magar ye chashm-e-hairan jis ki hairani nahin jaati

nahin jaati mata-e-lal-o-gauhar ki giran-yabi

mata-e-ghairat-o-iman ki arzani nahin jaati

miri chashm-e-tan-asan ko basirat mil gai jab se

bahut jaani hui surat bhi pahchani nahin jaati

sar-e-khusrau se naz-e-kaj-kulahi chhin bhi jaata hai

kulah-e-khusravi se bu-e-sultani nahin jaati

ba-juz divangi vaan aur chara hi kaho kya hai

jahan aql o khirad ki ek bhi maani nahin jaati

Leave a Comment