kab peḌ ki manind Thaharte hain musafir
suraj ko liye saath guzarte hain musafir
yuun ḳhauf-e-fasadat se chupka hai zamana
ab shahr men aane se bhi Darte hain musafir
tariki-e-shab kahkashan maang rahi hai
phir raat ke pahlu men sanvarte hain musafir
ghar se to nikal aa.e hain jazbat ki rau men
nairangi-e-halat se Darte hain musafir
sahil ka tajassus hai junun-ḳhez hai manzar
girdab men hans hans ke utarte hain musafir
main ek samundar huun tah-e-ab mujhe dekh
mujh se hi guhar le ke ubharte hain musafir
himmat na kabhi haar na mayus ho ‘ḳhalid’
koshish ki badaulat hi sanvarte hain musafir
Leave a Reply