Mujhe To Intizar-E-Ishq Mein Hi Lutf Aata Hai

mujhe to intizar-e-ishq men hi lutf aata hai

kisi ki chahaton ka rang har dhadkan pe taari ho

ajab sa karb bechaini musalsal be-qarari ho

nigahen muntazir furqat kasak aur ah-o-zari ho

mujhe to intizar-e-ishq men hi lutf aata hai

kabhi pahlu men milta hai kabhi vo duur jaata hai

kisi ke jism o jaan ko ishq har lamha jalata hai

tasavvur kaise kaise dil-nashin manzar dikhata hai

mujhe to intizar-e-ishq men hi lutf aata hai

abhi to furqat-e-janan ke qisse khuub likhne hain

dabi chahat ke naghme aur tarane khuub likhne hain

rifaqat men judai ke fasane khuub likhne hain

mujhe to intizar-e-ishq men hi lutf aata hai

‘alina’ intizar-e-ishq ghazlon ko saja dega

visal-e-yar to bas chand lamhon ka maza dega

milan ho phir judai aisa pal har pal saza dega

mujhe to intizar-e-ishq men hi lutf aata hai

Leave a Comment