Aise Chup Chup Bhi Kya Jiya Jae

aise chup chup bhī kyā jiyā jaa.e

ab kahīñ ishq hī kiyā jaa.e

dil ke shīshe pe hai ġhubār bahut

aaj kuchh der ro liyā jaa.e

ajnabī shahr be-namak chehre

kise ham-rāz-e-dil kiyā jaa.e

habs kī pyaas hai bujhegī kahāñ

āb-e-haivāñ hī go piyā jaa.e

dil hai vīrān shahr bhī ḳhāmosh

phone hī us ko kar liyā jaa.e

ek dīvār-e-jism baaqī hai

ab use bhī girā diyā jaa.e

ho gayā taar taar har manzar

‘shām’ chāk-e-nazar siyā jaa.e

Leave a Comment