Guzarna Hai Ji Se Guzar Jaiye

guzarnā hai jī se guzar jā.iye

liye dīda-e-tar kidhar jā.iye

khule dil se miltā nahīñ ab koī

use bhūlne kis ke ghar jā.iye

subuk-rau hai mauj-e-ġham-e-dil abhī

abhī vaqt hai paar utar jā.iye

ulaT to diyā parda-e-shab magar

nahīñ sūjhtā ab kidhar jā.iye

ilāj-e-ġham-e-dil na sahrā na ghar

vahī hū kā aalam jidhar jā.iye

isī moḌ par ham hue the judā

mile haiñ to dam bhar Thahar jā.iye

kaThin haiñ bahut hijr ke marhale

taqāzā hai hañs kar guzar jā.iye

ab us dar kī ‘aḳhtar’ havā aur hai

liye apne shām-o-sahar jā.iye

Leave a Comment