guzarna hai ji se guzar ja.iye
liye dida-e-tar kidhar ja.iye
khule dil se milta nahin ab koi
use bhulne kis ke ghar ja.iye
subuk-rau hai mauj-e-gham-e-dil abhi
abhi vaqt hai paar utar ja.iye
ulaT to diya parda-e-shab magar
nahin sujhta ab kidhar ja.iye
ilaj-e-gham-e-dil na sahra na ghar
vahi hu ka aalam jidhar ja.iye
isi moḌ par ham hue the juda
mile hain to dam bhar Thahar ja.iye
kaThin hain bahut hijr ke marhale
taqaza hai hans kar guzar ja.iye
ab us dar ki ‘aḳhtar’ hava aur hai
liye apne sham-o-sahar ja.iye
Leave a Reply