Kya KHabar Thi Ye Din Bhi Dekhenge

kyā ḳhabar thī ye din bhī dekheñge

ḳhuun bo.eñge sabr kāTeñge

kis ko munsif kaheñ kise qātil

bach rahe kal talak to socheñge

maiñ agar yuuñ hī sar uThātā rahā

log apne hī but ko pūjeñge

aap apnā bhī jā.eza le leñ

ham to apnī sazā ko pahuñcheñge

qaum maz.hab zamīn rañg zabāñ

yūñhī kab tak lakīreñ khīñcheñge

kyā tumheñ bhī gumān thā ‘anjum’

ham ḳhud apne badan ko nocheñge

Leave a Comment