Alok Mishra
mere hi as-pas ho tum bhi
in dinon kuchh udaas ho tum bhi
barha baat jiine marne ki
ek bikhri si aas ho tum bhi
sail-e-naghma pe itni hairat kyuun
is nami se shanas ho tum bhi
main bhi Duuba huun asmanon men
ḳhvab men mahv-e-yas ho tum bhi
main huun TuuTa sa paimana
ek ḳhali gilas ho tum bhi
gar main dukh se saja hua huun to
ranj se ḳhush-libas ho tum bhi
apni fitrat ka main bhi maara huun
apni aadat ke daas ho tum bhi
meri miTTi bhi ret ki si hai
aur sahra ki pyaas ho tum bhi
Leave a Reply