Gar Mere Baithne Se Wo Aazar Khinchte

gar mere baithne se vo azar khinchte

to apne dar ki aa ke vo divar khinchte

naaz o ada o ghamza se yuun dil liya mira

le jaaen jaise mast ko hushyar khinchte

va hasrata hui unhen aane ki tab khabar

laae jab us gali men mujhe yaar khinchte

aaega un ke kahne se vo gul yahan talak

kanton pe kyuun hain ab mujhe aghyar khinchte

vaan shauq jaliyon ka hai us jama-zeb ko

yaan apne pairahan se hain ham taar khinchte

tegh-e-nigah-e-yar uchatti lagi hai phir

barson guzar gae mujhe azar khinchte

kahte hain shab vo kahte the aata hai ji ghuta

naale jo ham rahe pas-e-divar khinchte

azurda un ko dekhte hi jaan nikal gai

vo dekh mujh ko rah gae talvar khinchte

taskin’ ka chaak chaak hua dil jo shane ko

dekha kisi ka turra-e-tarrar khinchte

Leave a Comment