Siyah Dard Ka Ye Saeban Gir Jae

siyāh dard kā ye sā.ebān gir jaa.e

hamīñ pe TuuT ke kaash āsmān gir jaa.e

ḳharāba-e-dil-e-tanhā na dekhā jā.egā

hamīñ makīñ haiñ to ham par makān gir jaa.e

maiñ is laraztī sī dīvār-e-dil kā nauha huuñ

jo kahte kahte koī dāstān gir jaa.e

sambhal sambhal ke uThā bār-e-bekasī kā pahāḌ

tire jigar pe na sar kī chaTān gir jaa.e

na aise lauñg ghumā naak meñ hasīñ muTiyār

jo hal chalāte haiñ koī kisān gir jaa.e

duā-e-nīm-shabī aur yaqīn-e-be-asrī

ki jaise tiir se pahle kamān gir jaa.e

‘musavvir’ aisī huī tañg ye zamīñ ham par

baḌhīñ jidhar bhī vahīñ āsmān gir jaa.e

Leave a Comment