Rahi Fidai
na sitara na hi ham shams-o-qamar chahte hain
ham daraḳhton se faqat shaḳh-o-samar chahte hain
na zamin chahte hain aur na zar chahte hain
ham faqiran-e-ḳhuda ek hi dar chahte hain
dasht-o-dariya ke amiin bhi to hain avara nasib
sa.eban koi bhi ho apna hi ghar chahte hain
muntaqil apni nadamat na karo ghairon tak
tajraba ham bhi kahan bar-e-digar chahte hain
shisha-o-chob ke danon se na bahlenge kabhi
daur-e-hazir ke ye bachche to guhar chahte hain
mansab-o-jah haqiqat men hain mohtaji-e-dil
sochiye ḳhuub ye kya ilm-o-hunar chahte hain
bin bula.e hi musafir ye chale aa.e the
vasvase aap se ab izn-e-safar chahte hain
tum to aḳhbar sunate ho jahan ke ‘rahi’
ham ki darvesh hain batin ki ḳhabar chahte hain
Leave a Reply