aghosh men jo jalvagar ik naznin hua
angushtari bana mira tan vo nagin hua
raunaq-faza lahad pe jo vo mah-jabin hua
gumbad hamari qabr ka charkh-e-barin hua
kanda jahan men koi na aisa nagin hua
jaisa ki tera naam mire dil-nashin hua
raushan hua ye mujh pe ki fanus men hai shama
haath us ka jalvagar jo tah-e-astin hua
rakhta hai khaak par vo qadam jab ki naaz se
kahta hai asman na kyuun main zamin hua
raushan shabab men jo hui sham-e-ru-e-yar
dud-e-charagh husn-e-khat-e-ambarin hua
ya rab gira adu pe ‘amanat’ ke tu vo barq
do tukde jis se shahpar-e-ruhul-amin hua
Leave a Reply