taaq men kaun rakh gaya ek diya aur ek phuul
dhyan men phir se jal uTha ek diya aur ek phuul
mere tumhare darmiyan qatra-e-ashk ra.egan
pichhli ruton ka saneha ek diya aur ek phuul
ḳhvab hi ḳhvab men kaTi umr tamam jal bujhi
tera kaha mira suna ek diya aur ek phuul
sham-e-firaq ki qasam aur to kuchh na paas tha
tere liye bacha liya ek diya aur ek phuul
bam-e-murad tak mire haath na ja sake magar
der talak jala kiya ek diya aur ek phuul
teri udaas aankh se mere ḳhamosh honT tak
harf-e-visal kya hua ek diya aur ek phuul
jashn ki raat jab tire naam pe log chup se the
main ne yunhi uTha liya ek diya aur ek phuul
Leave a Reply