Rahat Hasan
ranj ik talḳh haqiqat ka faqat hai mujh ko
mere ahbab ne aanka hi ghalat hai mujh ko
ba.ad muddat ke gulabon ki mahak aa.i hai
us ne pardes se bheja koi ḳhat hai mujh ko
mauj-e-tufan se begana hua huun phir main
phir mayassar hui asani-e-shat hai mujh ko
harf ki shakl men Dhalti hain lakiren ḳhud se
aa ke deta koi paigham-e-nuqat hai mujh ko
kar diya kund havaon ki nami ne jis ko
usi ḳhanjar se lagana koi qat hai mujh ko
kunj-e-tarik men yuun jhank raha huun ‘rahat’
jaise darkar koi baiza-e-bat hai mujh ko
Leave a Reply