Himayat Ali Shayar
ye shahr-e-rafiqan hai dil-e-zar sambhal ke
milte hain yahan log bahut ruup badal ke
aariz hain ki murjha.e hue phuul kanval ke
ankhen hain ki jhulse hue ḳhvabon ke mahal ke
chehra hai ki hai a.ina-e-gardish-e-dauran
shahkar hain kya kya mire naqqash-e-azal ke
farhad sar-e-dar hai shirin sar-e-bazar
badle nahin ab tak magar andaz ghazal ke
aa.e hain gham-e-ishq men aise bhi maqamat
dil ḳhuun hua aankh se aansu bhi na Dhalke
duniya bhi ik amaj-gah-e-husn hai ‘sha.ir’
dekho to zara hajla-e-janan se nikal ke
Leave a Reply