poet

Jaan Apni Chali Jae He Jae Se Kasu Ki

jaan apni chali jaae he jaae se kasu ki

aur jaan men jaan aae hai aae se kasu ki

vo aag lagi paan chabae se kasu ki

ab tak nahin bujhti hai bujhae se kasu ki

bujhne de zara atish-e-dil aur na bhadka

mehndi na laga yaar lagae se kasu ki

kya soiye phir ghul hai dar-e-yar pe shayad

chaunka hai vo zanjir hilae se kasu ki

kah do na uthae vo mujhe paas se apni

ji baitha hi jaata hai uthae se kasu ki

jab main ne kaha aaiye man jaiye bole

ham aur bhi ruthenge manae se kasu ki

chuppi men jo kuchh baat ki main ne to ye bole

ham to nahin dabne ke dabae se kasu ki

yaaro na charagh aur na main shama huun lekin

har shaam ko jalta huun jalae se kasu ki

paata nahin ghar us ka samajhta hi nahin hai

is bait ke maani bhi batae se kasu ki

jab us se kaha meri sifarish men kasu ne

hasil bhi rulae se kudhae se kasu ki

ik taan se ye hans ke laga kahne ki be-shak

ham rolte moti hain rulae se kasu ki

kahta hai ki ‘ehsan’ na kahega to sunega

matla ye kaha main ne kahae se kasu ki

More Poems

Leave a Comment