ilaj-e-zaḳhm-e-dil hota hai gham-ḳhvari bhi hoti hai
magar maqtal ki mere ḳhuun se gul-kari bhi hoti hai
vahi qatil vahi munsif adalat us ki vo shahid
bahut se faislon men ab taraf-dari bhi hoti hai
ye hai turfa-tamasha karbala-e-asr-e-hazir ka
gharon men qatilon ke ab aza-dari bhi hoti hai
ta.alluq un se TuuTa tha na TuuTa hai na TuTega
bahut mazbut zanjir-e-vafa-dari bhi hoti hai
vo mera dost hai ‘manzur’ lekin jab bhi milta hai
ḳhulus-e-dil men shamil kuchh riya-kari bhi hoti hai
Leave a Reply