chashm-e-nam kuchh bhi nahin aur sher-e-tar kuchh bhi nahin
ab yahan ḳhun-e-jigar naqsh-e-hunar kuchh bhi nahin
hai sabhi kuchh mehrban na-mehrban lafzon ka pher
zindagi men mo’tabar na-mo’tabar kuchh bhi nahin
dil se dil ko raah kaisi hai ye husn-e-ittifaq
varna duniya men mohabbat ka asar kuchh bhi nahin
jis hunar ko log samjhenge kabhi la.al-o-gohar
aaj ke bazar men aisa hunar kuchh bhi nahin
ahl-e-iman ka aqida hai ḳhuda ke baab men
hai vahi sab kuchh jo ta-hadd-e-nazar kuchh bhi nahin
apne apne fa.ede ki jang jaari hai yahan
chashm-e-bina men nizam-e-ḳhair-o-shar kuchh bhi nahin
ai sukut-e-la-makan men baiThne vaale bata
kya jahan-e-char-su ka shor-o-shar kuchh bhi nahin
har taraf se zulmaton ka ek sail-e-be-iman
is jahan men hasil-e-fikr-o-nazar kuchh bhi nahin
Leave a Reply