havaen jab ghantiyan bajaen to laut aana
kisi ki ankhen diye jalaen to laut aana
bahut dinon tak ye mausam-e-gul nahin rahega
jo shaḳh-e-jan par gulab aaen to laut aana
hava daraḳhton se jab gale mil ke ro rahi ho
parind lambe safar pe jaaen to laut aana
jo zid pe aa jaae dil to us ki bhi maan lena
purani yaden bahut sataen to laut aana
firaq ki aag chaat jaati hai jism-o-jan ko
jo sun sako vaqt ki sadaen to laut aana