gham sahte sahte muddat tak aisi bhi halat hoti hai
ankhon men ashk umaDte hain rone se nafrat hoti hai
jab raat ka sannaTa hota hai dil men ḳhalvat hoti hai
tum chandni jaise chhiTka do aisi kaifiyyat hoti hai
aalam par jaise chha.e hon mahbub ki god men aa.e hon
ab dil ki mohabbat men aksar aisi mahviyyat hoti hai
jab hasrat-o-arman miT jaa.en kuchh aas na ho kuchh yaas na ho
jab maut ki niind aa.e dil ko bedar mohabbat hoti hai
jab ranj zamana deta hai ham maut ko davat dete hain
phir tum kyuun yaad aa jaate ho jiine ko tabi.at hoti hai
meraj-e-junun ke raste men aisa bhi maqam ik aata hai
ham hosh men hote hain lekin apne se bhi vahshat hoti hai
be-dad ki bhi us zalim ko vo pyari ada.en aati hain
mar mar ke jiye jaane ko ‘jigar’ afsos tabi.at hoti hai
Leave a Reply