Ali Manzoor Hyderabadi
barham-kun-e-dil yuun kabhi barham na hua tha
hairat-asar aisa mira aalam na hua tha
un shoḳh nigahon ne taḌap aur baḌha di
allah abhi dard-e-jigar kam na hua tha
ab bhi mujhe ḳhuddari-e-janan men nahin shak
pahle bhi mira dil mutavahham na hua tha
ai pir-e-mughan us ki baqa men mujhe shak hai
vaqif asar-e-jam se kya jam na hua tha
vo shoḳh mujhe dekh ke yuun sharm se jhuk jaa.e
jis ka sar-e-maghrur kabhi ḳham na hua tha
is kam-nigahi ne to mujhe maar hi Daala
aisa asar ai pursish-e-paiham na hua tha
mash.hur vo ‘manzur’ hai jis ke liye kal tak
sarma-e-shohrat hi faraham na hua tha
Leave a Reply