sina-e-sha.ir gham se bhara hai aankh magar namnak nahin hai
roz-e-azal se hai divana daman lekin chaak nahin hai
hijr ke gham men rone vaale tera alam duniya ki nazar men
kal bhi ibrat-nak nahin tha aaj bhi ibrat-nak nahin hai
shikva-ba-lab vo rind hain saaqi aaj bhi tere maiḳhane men
tishna-dahan baiThe hain lekin arz-e-talab bebak nahin hai
sha.ir ki avara tabi.at asl men hai taz.in-e-mohabbat
naseh mushfiq tum sab kuchh ho sirf yahi idrak nahin hai
tu hi bata ham aise insan teri gali men kyuun aate hain
teri ada.en shoḳh nahin hain teri nazar bebak nahin hai
main hi kya kuchh aur yagane meri tarah hain tere divane
parvanon ki ḳhaak men shamil lekin meri ḳhaak nahin hai
tum ne ‘aziz’ us ki mahfil men shab na sahi lamhe tu guzare
mustaqbil ki fikr to kyuun ho haal bhi hasrat-nak nahin hai
Leave a Reply