Rahat Indori
sirf sach aur jhuuT ki mizan men rakkhe rahe
ham bahadur the magar maidan men rakkhe rahe
jugnuon ne phir andheron se laḌa.i jiit li
chand suraj ghar ke raushan-dan men rakkhe rahe
dhire dhire saari kirnen ḳhud-kushi karne lagin
ham sahifa the magar juzdan men rakkhe rahe
band kamre khol kar sachcha.iyan rahne lagin
ḳhvab kachchi dhuup the dalan men rakkhe rahe
sirf itna fasla hai zindagi se maut ka
shaḳh se toḌe ga.e gul-dan men rakkhe rahe
zindagi bhar apni gungi dhaḌkanon ke saath saath
ham bhi ghar ke qimti saman men rakkhe rahe
Leave a Reply