Qaisar Siddiqi
rishta kaise TuTta hai ḳhvab se ta.abir ka
aao dikhla.un tumhen ye khel bhi taqdir ka
ai musavvir hai yahi hasil tiri tahrir ka
husn ḳhud hi pairahan hai husn ki tasvir ka
ban gaya hai isti.ara husn-e-alam-gir ka
a.ina-dar-a.ina chehra miri tahrir ka
jaise jaise qaid ki mi.ad ghaTti ja.egi
tang hota ja.ega halqa miri zanjir ka
ye kitab-e-dil hai qur.an-e-mohabbat hai huzur
marhala dar-pesh hai is husn ki tafsir ka
sach agar puchho to mere pir-o-murshid hain yahi
main aqidat-mand huun ‘qaisar’ janab-e-mir ka
Leave a Reply