manao jashn-e-mohabbat ki ḳhuun ki bu na rahi
baras ke khul gae barud ke siyah badal
bujhi bujhi si hai jangon ki aḳhiri bijli
mahak rahi hai gulabon se tashqand ki shaam
jagao gesu-e-janan ki ambarin raten
jalao saad-e-simin ki sham-e-kafuri
tavil boson ke gul-rang jaam chhalkao
ye surḳh jaam hai ḳhuban-e-tashqand ke naam
ye sabz jaam hai lahore ke hasinon ka
safed jaam hai dilli ke dilbaron ke liye
ghula hai jis men mohabbat ke aftab ka rang
khuli hui hai ufuq par shafaq tabassum ki
nasim-e-shauq chali mehrban takallum ki
labon ki shoala-fishani hai shabnam-afshani
isi men sub.h-e-tamanna naha ke nikhregi
kisi ki zulf na ab sham-e-gham men bikhregi
javan ḳhauf ki vaadi se ab na guzrenge
jiyale maut ke sahil pe ab na utrenge
bhari na jaegi ab ḳhak-o-ḳhun se maang kabhi
milegi maan ko na marg-e-pisar ki ḳhush-ḳhabari
koi na dega yatimon ko ab mubarakbad
khilenge phuul bahut sarhad-e-tamanna par
ḳhabar na hogi ye nargis hai kis ki aankhon ki
ye gul hai kis ki jabin kis ka lab hai ye laala
ye shaḳh kis ke javan bazuon ki angdai
bas itna hoga ye dharti hai shahsavaron ki
jahan-e-husn ke gumnam tajdaron ki
ye sarzamin hai mohabbat ke ḳhvastgaron ki
jo gul pe marte the shabnam se pyaar karte the
ḳhuda kare ki ye shabnam yuun hi barasti rahe
zamin hamesha lahu ke liye tarasti rahe