ai ḳhvab-e-dil-navaz na aa kar sata mujhe
hai niind aa.i TuuT kar ba.ad-az-qaza mujhe
main to jabin-e-shauq par likhta gaya use
vo bhi nigah-e-naz se paḌhta raha mujhe
us ki ḳhiram-e-naz pe marte rahe sabhi
lekin nuqush-e-la.al men dekha gaya mujhe
vo zam hue kuchh aise miri ka.enat men
vo hi milenge tum se jo doge sada mujhe
ik phuul aur khil gaya ahd-e-bahar men
ik sang jab bhi taan ke maara gaya mujhe
‘sarvar’ ki ek baat ne bedar kar diya
chehre pe sard aab ka chhinTa diya mujhe
Leave a Reply