na chhoḌa dil-e-ḳhasta-jan chalte chalte
ghazab kar chale mehrban chalte chalte
kahenge kuchh ai baghban chalte chalte
agar degi yaara zaban chalte chalte
gire ham pas-e-karvan chalte chalte
thake paanv apne kahan chalte chalte
tiri chaal bad-e-ḳhizan ne uḌaa.i
ujaḌa mira ashiyan chalte chalte
karo ankhen jhapka ke tirchhi nigahen
sinanen chalin barchhiyan chalte chalte
bharen sard aahen jo garm aah bhar ke
nasim aa.i bad-e-ḳhizan chalte chalte
na ghabra zara daman-e-roz-e-mahshar
karunga tiri dhajjiyan chalte chalte
adam ko chale qaid zulf-e-sanam men
rahen paanv men beḌiyan chalte chalte
dam-e-naz.a sar par gire koh-e-ulfat
uTha.in baḌi saḳhtiyan chalte chalte
miri laash ko paanv se ḳhuub raunda
thame surat-e-asman chalte chalte
bas ab to adam men mulaqat hogi
ye kahte ga.e raftagan chalte chalte
na qatil ne tegh-e-nigah tak laga.i
na karta gaya imtihan chalte chalte
jahan se ga.e hashr tak ḳhuub so.e
liya saath ḳhvab-e-giran chalte chalte
rahe umr-bhar teri vahdat ke qaa.il
na liin ham ne do hichkiyan chalte chalte
‘rashid’-e-hazin laakh roka kiye ham
vo lete ga.e naqd-e-jan chalte chalte
Leave a Reply