Kuchh Aisa to Abhi Socha Nahin Hai

kuchh aisā to abhī sochā nahīñ hai

ki jo merā hai vo us kā nahīñ hai

muravvat se zarā dhundlī haiñ āñkheñ

ye mat samjho nazar aatā nahīñ hai

abhī kal hī to kuchh va.ade kiye the

tumhārā hāfiza achchhā nahīñ hai

yahī to jaḌ hai saarī nafratoñ kī

mohabbat ko koī samjhā nahīñ hai

tum aurat ho zarā mohtāt rahnā

zamāna is qadar badlā nahīñ hai

chalo shīshe ko to nāzuk bhī kah deñ

koī patthar hai jo TuuTā nahīñ hai

hamāre muñh pe ham se jhuuT bole

hamārā aa.ina aisā nahīñ hai

Leave a Comment