kis qadar dilruba-numa hai dil
ḳhana-e-ghair ho gaya hai dil
har ghaḌi kyuun na zalzale men rahe
mash.had-e-hasrat-o-vafa hai dil
maut bhi sahal kuchh nahin apni
kis liye taqat-azma hai dil
maslahat is men ho na koi kaash
dushman-e-jan ho gaya hai dil
sab se lag chalne ki hui hai kho
kis qadar sarf-e-ashna hai dil
shaiḳh-e-san.an ka yaad hai qissa
saḳht kafir buri bala hai dil
apni halat men mubtala huun aap
dil-ruba jaan hai jan-ruba hai dil
balbe vamandgi ki tez ravi
jaise jaane pe aa gaya hai dil
kis jafa-kar ki vafa hai jaan
kis sitam-kash ka mudda.a hai dil
teri ulfat ka naqd dagh-e-jigar
meri hasrat ka ḳhun-baha hai dil
kahiye kis se laga liya lagga
ai ‘qalaq’ kyuun ke lag chala hai dil
Leave a Reply