kabhi mili jo tire dard ki nava mujh ko
ḳhamoshiyon ne mujhi se kiya juda mujh ko
badan ke suune khanDar men kabhi jala mujh ko
main teri ruuh ki zau huun na yuun bujha mujh ko
main apni zaat ki ham-sa.egi se Darta huun
mire qarib ḳhuda ke liye na la mujh ko
main chup huun apni shikast-e-sada ki vahshat par
mujhe na bolna paḌ jaa.e mat bula mujh ko
ye main tha ya mire andar ka ḳhauf tha jis ne
tamam umr di tanha.i ki saza mujh ko
bhaTak raha huun main be-samt raston ki tarah
kisi bhi samt ka ho rasta dikha mujh ko
har ik ne dekha mujhe apni apni nazron se
koi to meri nazar se bhi dekhta mujh ko
samo ke ankhon men umDi ghaTa.en ai ‘azad’
vo ek dard ka sahra bana gaya mujh ko
Leave a Reply