tiri mahfil men farq-e-kufr-o-iman kaun dekhega
fasana hi nahin koi to unvan kaun dekhega
yahan to ek laila ke na jaane kitne majnun hain
yahan apna gareban apna daman kaun dekhega
bahut nikle hain lekin phir bhi kuchh arman hain dil men
ba-juz tere mira ye soz-e-pinhan kaun dekhega
agar parde ki jumbish se larazta hai to phir ai dil
tajalli-e-jamal-e-ru-e-janan kaun dekhega
agar ham se ḳhafa hona hai to ho ja.iye hazrat
hamare ba.ad phir andaz-e-yazdan kaun dekhega
mujhe pi kar bahakne men bahut hi lutf aata hai
na tum dekhoge to phir mujh ko farhan kaun dekhega
jise kahta hai ik aalam ‘aziz’-e-varis-e-alam
use aalam men hairan-o-pareshan kaun dekhega
Leave a Reply