Chain duniya Mein Zamin Se Ta-Falak dam Bhar Nahin

Imam Bakhsh Nasikh

chain duniya men zamin se ta-falak dam bhar nahin

daagh hain ye gul nahin nasur hain akhtar nahin

sar rahe ya jaae kuchh ham mai-kashon ko dar nahin

kaun sa mina-e-mai ai mohtasib be-sar nahin

vo but-e-shirin-ada karta hai mujh ko sangsar

ye shakar-pare baraste hain junun patthar nahin

ho raha hai ek aalam tere abru par nisar

kaun gardan hai jahan men jo tah-e-khanjar nahin

dam nikalne par jo aata hai nahin rukta hai phir

dekh lo qasr-e-habab ai ahl-e-ghaflat dar nahin

aadmi to kya vo kahta hai nishan-e-pa se bhi

kyuun pada hai mere kuche men tira kya ghar nahin

ai tasavvur kyuun buton ko jama karta hai yahan

dil mira kaaba hai kuchh but-khana-e-azar nahin

shikva jo be-naukri ka karte hain nadan hain

aap aaqa hai kisi ka jo koi naukar nahin

hai kharabat-e-jahan men bhi vo saaqi se nufur

jo ki ai ‘nasikh’ ghulam-e-saqi-e-kausar nahin