laraz raha tha falak arz-e-hal aisa tha
shikastagi men zamin ka saval aisa tha
kamal aisa ki hairat men charḳh-e-nili-fam
shajar uTha na saka sar zaval aisa tha
kisi vajud ki koi ramaq na ho jaise
daraz silsila-e-mah-o-sal aisa tha
khila hua tha badan par jarahaton ka chaman
ki zaḳhm phail gaya indimal aisa tha
kabhi ye taḳht-e-sulaiman kabhi saba raftar
nasha chaḌha to samand-e-ḳhayal aisa tha
ghire hue the jo badal baras ke tham bhi ga.e
bichha hua tha jo taron ka jaal aisa tha
kabhi vo shola-e-gul tha kabhi gul-e-shola
mizaj-e-husn men kuchh e’tidal aisa tha
vo ankhen qahr men bhi kar ga.iin mujhe shadab
farogh-e-bada men rang-e-jamal aisa tha
kisi se haath milane men dil nahin milta
talab men sha.iba-e-ehtimal aisa tha
Leave a Reply