khulti hi nahin aankh ujalon ke bharam se
shab-rang hua ja.un main suraj ke karam se
tarkib yahi hai use phulon se Dhaka jaa.e
chehre ko bachana bhi hai patthar ke sanam se
ik jhiil sarikhi hai ghazal dasht-e-adab men
jo duur thi jo duur rahi duur hai ham se
aḳhir ye khula vo sabhi tajir the guhar ke
jin ke bhi marasim the mire dida-e-nam se
kyuun kar vo kisi miil ke patthar pe Thahar jaa.e
kyuun rind ki nisbat ho tire dair-o-haram se
ye mere taḳhallus ka asar mujh pe hua hai
ab yaad nahin apna mujhe naam qasam se
Leave a Reply