Sufi

Apni Hasti Se Tha Khud Main Bad-Guman Kal Raat Ko

apni hasti se tha khud main bad-guman kal raat ko

kuchh na tha andesha-e-sud-o-ziyan kal raat ko

chandni barsat sehn-e-gulistan dilkash hava

thiin hujum-e-gham men ye ranginiyan kal raat ko

vusat-e-takhil ke halqe men tha arsh-e-barin

dekhti thiin chashm-e-dil kaun-o-makan kal raat ko

mil rahe the dast-e-ulfat se mujhe jam-e-sharab

mehrban tha vo but-e-na-mehraban kal raat ko

vo mohabbat ki nigahen vo mohabbat ke kalam

haan do-bala thi ada-e-dil-satan kal raat ko

har nazar paigham har andaz men raqsan ummid

aur hi tha us ka tarz-e-imtihan kal raat ko

iffat-e-ulfat se thi aina-e-dil ki jila

varna tha jazbat ka dariya ravan kal raat ko

zauq se vo sun rahe the dastan-e-gham miri

ho raha tha inqilab-e-asman kal raat ko

dil ki ik avaz thi is bazm men tafsir-e-gham

ho chuke the vo bhi majbur-e-fughan kal raat ko

tafarqe be-ai.tmadi dushmani makr-o-fareb

thi tiri taabir ai hindostan kal raat ko

so chuke the chand hi ghanton men arbab-e-nashat

sub.h tak tha saath vo aram-e-jan kal raat ko

rang-e-sahba chashm-e-nargis men tha ‘asi’ vaqt-e-sub.h

jagne se ho rahi thiin khun-fishan kal raat ko

More Poems

Leave a Comment