Najma Shaheen Khosa
yadon ke sa.eban men basar kar rahi hai raat
ḳhake men zindagi ke dhanak bhar rahi hai raat
mujh se hai ham-kalam ya tujh se hai us ki baat
viran raston ka safar kar rahi hai raat
muddat se jal rahe hain yahan aas ke diye
bujhte charagh ko bhi qamar kar rahi hai raat
un ki mahak hai aaj mire dil se duur kyuun
phulon se jholiyon ko agar bhar rahi hai raat
dil ko kiya malul aur viran aankh ko
kuchh yuun bhi jism-o-jan men qadam dhar rahi hai raat
rakh kar rida-e-ishq men kuchh phuul aur ḳhvab
‘shahin’ aaj meri tarah mar rahi hai raat
Leave a Reply