Na Kunisht-O-Kalisa Se Kaam Hamein dar-e-dair Na Bait-e-Haram Se Gharaz

Bedam Shah Warsi

na kunisht-o-kalisa se kaam hamen dar-e-dair na bait-e-haram se gharaz

ki azal se hamare sajdon ko rahi tere hi naqsh-e-qadam se gharaz

jo tu mehar hai to zarra ham hain tu bahr hai to qatra ham hain

tu surat hai ham aina hamen tujh se gharaz tujhe ham se gharaz

na nashat-e-visal na hijr ka gham na khayal-e-bahar na khauf-e-khizan

na saqar ka khatar hai na shauq-e-iram na sitam se hazar na karam se gharaz

rakha kucha-e-ishq men jis ne qadam hua hazrat-e-ishq ka jis pe karam

use aap se bhi sarokar nahin jo gharaz hai to apne sanam se gharaz

tiri yaad ho aur dil-e-‘bedam’ ho tira dard ho aur dil-e-‘bedam’ ho

‘bedam’ ko rahe tire gham se gharaz tire gham ko rahe ‘bedam’ se gharaz